حينما اصبح الزمالك حديث الساعة و الدقيقة..والثانية!!

[ندعوك للتسجيل في المنتدى أو التعريف بنفسك لمعاينة هذه الصورة]

[b][size=12]دخل الاستاذ سعيد شملول كافية نضيف اللى الميه المعدنيه فيه بتطرقع بمعدل ازازة كل عشر دقايق ويدفع فيها الزبون 6جنيه ونص وهو مرتاح ومكبر؛ ده غير الـ12% الخدمة و10% الضريبة..المهم دخل ليشاهد مباراة الزمالك وبتروجيت..شعر الاستاذ سعيد انه يحتاج ان يشاهد فريقه المتألق فى هدوء..فقرر بعد 6 انتصارات متتالية ان يبعد عن مشاهدة الماتش على قهوة "الهتيفة"..لانه اراد رؤية الزمالك هذه المرة من زاوية الناقد والمحلل..لا ان يراه كمشجع..اراد اشباع رغبته الكروية بالتمعن هذه المرة فى فريقه..فهو يشاهد الكرة منذ بداية الثمانينات بانتظام..يعشق الفانلة البيضاء..كم من المرات ذهب للاستاد..نبح صوته من رجة هدف..وكم من مرارة فقعت بسبب لاعبين دمروا تاريخ نادى كبير..فجلس وطلب مانجو ساقع..والميه المعدنية الاجبارى..ليرى هل فريقه سينجح فى اقصى اختبار منذ تولى حسام حسن..
جاء احد الاشخاص وجلس بجانبه..كان مهتم هو الاخر..فسأله هو فات كام..فرد الاستاذ سعيد..5 دقايق.. ماتقلقش مافاتش حاجة..فرد الرجل..بس الزمالك دلوقتى الواحد يجرى يتفرج على الماتش من اوله.. فضحك الاستاذ سعيد..ده اكيد..معاك سعيد شملول..فرد الرجل..تشرفنا يا بيه..محمود البرادعى من كبير مشجعى الزمالك القدام..(ملحوظة:نفسى اشوف حد يقول من صغار مشجعى الزمالك..اذا كان كله كبير..مين طيب المشجع العادى؟؟!)..المهم..رد الاستاذ سعيد..البرادعى؛قريب الدكتور محمد..فرد الاستاذ محمود..وحياة ابوك بلاش سياسة..خلينا نتفرج على سياسة حسام العجيبة..وبدأ الاثنين فى شد اطراف الحديث..
سعيد:الحقيقة..حسام..قدر فى فترة صغيرة انه يثبت ان الكورة اخد وعطا زى السكينة فى الحلاوة كده.
نظر الاستاذ محمود لسعيد متعجبا من اللفظ..وخصوصا انه فى كافيه نضيف..فرد..الحقيقة حسام كنا بنقول عليه مقاتل وعايز يفوز..تحس انه بلغة الطب عندنا ادى للعيبة بتاعتنا كورتيزون.
عاد سعيد للباقته..متسائلا..سيادتك الدكتور محمود البرادعى اللى عيادته فى اول الشارع.
فرد محمود..نعم..وسايب العيادة ياسيدى عشان اجى اشوف ماتش الزمالك براحتى.
رد سعيد مرحبا بشدة..الحقيقة تشرفت بيك يادكتور وسعيد ان فيه زمالكاوية كده..بص يادكتور..انا عاوز اقولك ..الواحد مبسوط بحسام..لانه واحد دخل يشتغل من اول يوم..الغريب انه فعلا رغم انى كنت واحد عنده قناعة انه مش حيعمل اى حاجة..بس قدر يجمع كل الزمالكاوية تانى قدام التليفزيون بعد مرحلة ملل رهيبة..كنا على طول متأخرين بجول من اول الماتش..اللى حسام عمله..انه قدر يحط كل واحد عند حده..قدر يفرض نظام ما على الفريق..النظام ده خلى الجماهير تسكت على اللاعب المقصر فى الملعب..يعنى حضرتك لما كان احمد غانم يغلط..كنا بنحاربه حتى لو لعب الماتش كله حلو..دلوقتى اى غلط مثلا بنلتمسله العذر..الله جولللل..ايه الحلاوة ده يا شيكا انت ورحيل وجعفر..الله يابنى والله..
كانت جملة شيكابالا رحيل جعفر..الزمت الجميع على التهليل..لانه ولاول مرة نرى للزمالك جمل تشعر ان من يجلس فى الاحتياطى يشعر بها قبل اللى فى الملعب..بلاى استيشن ان صح التعبير
رد البرادعى..فعلا..هو ده اللى بقوله..اوبا..بنالتى للبتروجيت..احنا لحقنا..بس عارف..احلى حاجة فى الزمالك اننا بدأنا نحس انه سهل نخطف اجوان بعد ما كنا بنحس اننا بنلعب على جبل.
سعيد:يابيه معلش..المهم..شايف كل الجماهير اللى فى الاستاد..سابتها خلاص من نقد لاعبيها..بتشجع وبس..وده وظيفتها..تحس ان حسام من منتديات الزمالك..فتح السيتات الزمالكاوية..واخرج افكار شباب يمكن كان فاهم طبيعة اللاعبين المصريين اكتر من الاجانب.
محمود:مفيش شك ان الاجنبى مميزاته وعيوبه كتير..بس كان مشكلة لاعيبة الزمالك انها بتقفش على مدربيها وده كان بيدمر فريقها..دلوقتى يبقى واحد كده يتمرد او يطلب تعاطف الجماهير..محدش يقدر..لان كله عارف دلوقتى..الجاهز..اللى تركيزه فى الملعب بس..اللى مش حيقول ويعيد ويزيد هو اللى حيلعب..شغل انا مظلوم ومخدتش حقوقى ده انتهى..شوف حازم امام كان موهبة..بدأ يخرف..اتركن..عشان يعرف انه يلتزم حيلعب ويأدى لانه مجبر على كده..شوف ابراهيم صلاح..واحد كان حيمشى ويتألق فى حته تانية..دلوقتى الواد بيموت نفسه عشان يعيش فى الزمالك.
انتهى الشوط الاول..والنتيجة لا تزال 1-1..وبدأ الشوط الثانى..
سعيد:بص على حسين ياسر..لعب فى الاهلى..بركات جديد..انما مشكلة الاهلى..انهم لما يقفشوا على فكرة يبقى انتهى..عندك وليد صلاح..طول عمرهم يقولك بتاع شوط..وبعدين بتاع عشرين دقيقة..وبعدين يلم كور..انما ده لعيب محترف..ودولى..اكيد فيه موهبة جواه مدفونه..وبعدين شوف كام مرة نزل ولعب..بس هو البدرى لازم يثبت مثلا انه وحش وبتاع شوط..خلى جماهير الاهلى بعد ما كانت بتقولك لو كان فيه الخير..ما كان رماه الطير..دلوقتى بتقولك الله يحرق الطير على اللى رماه.
ضحك الدكتور البرادعى بشدة..فقاطعهم شيكابالا بجول جعل الضحكة تتحول لصريخ..و جلس الاثنان فى صمت قليلا يشاهدون الزمالك الذين افتقدوا متعته..ورويدا ركض كارلويس غانم سلطان معرضا لجعفر الكرة محرزا الهدف الثالث..فبدأوا فى الثناء وعلى تأكيد اقوالهم على ان حسام جعل من غانم باك عصرى مرة اخرى ..سريعا..احرز بتروجيت هدف من ضرية جزاء مشكوك فى صحتها..وانتهت المباراة.
سعيد:الحمد لله..بجد النهاردة زاد يقينى ان الزمالك فعلا راجع..بص يا دكتور..كنت دايما بقول الزمالك نسى يعنى ايه تكتيك..انا مبسوط ان فيه دلوقتى التزام خططى صح..شوف مثلا حسن مصطفى فاق ازاى..عشان شايف اللى حواليه فايقين..بص جعفر..يمكن هو مش سوبر..بس على قد امكانياته وبعد ما حس انه لما يموت نفسه حيلعب..قبل كده عمرو وميدو كان بيلعبوا كده كده..فكله مات.
قاطعه الدكتور محمود..استأذنك عشان عندى شغل..تشرفت بيك يا استاذ سعيد..خلى بالك..سنانك عايزة تتنضف ..ماتفتكرش انها دعاية..وضحك الاثنان..الحساب انا دفعته خلاص
حلف الاستاذ سعيد انه لن يحدث ابدا..ولكن باصرار الدكتور محمود..رضى الاستاذ سعيد..ولكنه دفعه فضوله ان يعرف ثمن الطلبات..فوجدها 52.5 على واحد مانجو واتنين مياه معدنية وواحد شاى وفنجان قهوة للدكتور محمود..فقال..كله يهون عشانك يا زمالك.
ايام مرت..وكانت مباراة الزمالك والجيش..قرر الاستاذ سعيد هذه المرة العودة لقهوته المفضلة"الهتيفة"..اشتاق لمناوشات الاهلاوية..واشتاق هو لرسائلهم وتحديهم على ان الدورى ابيض بعدما انقطعت المراهنات ست سنين ..وهو الان متشوق لعودة التحديات.
دخل القهوة مناديا سيد عشان الحجرين والشاى السكر زيادة والمياة المشبره..لا معدنية ولا يحزنون..
سعيد:ايه يا استاذ شعبان..محدش سمع صوتك امبارح بتهيص على الجول بتاع متعب..ولا انت ضميرك انبك عشان بلنتى قناوى.
شعبان:بقولك ايه..حتتكلم كتير..خلاص يا عم ماتشينا معاكم هو اللى حيحدد..حتى لو ماخدتوش الدورى.. بس انتوا حتفوزوا علينا
سعيد:اوبا..ده الاهلاوية فعلا بدأوا يخافوا يا ولاد..سيبك انت..كلمنى عن حسين ياسر كده
شعبان:والله مانا عارف ازاى يمشوه هو وسعيود..ويرجعوا يقولك تريكة مصاب وبركات تعبان..مش عارف ليه احمد حسن لازم يلعب ومايتغيرش رغم انه كتير لازم يتغير.
دخل سيد صبى القهوة يرص الحجرين..يا استاذ سعيد..انت كنت خايف وماجتش ماتش بتروجيت..احنا حناخد الدورى كده كده..احنا الاهلى 106 بطولة انت مين.
سعيد:بس يابنى..يا حبيبى قولى كمان 6-1..صدقنى..الزمالك اللى قتل فيه احساسى 5 سنين..خلانى ممكن اقدر ارد عليك فى الملعب..ده اللى حسام حسن خلانا حاسين بيه دلوقتى..يابنى حسام بكل بساطه خلى الفريق يتكلم بره وجوه..وبعدين ياد انت انا اتفرجت على بتروجيت فى حتة نضيفة مع ناس بتفهم.
شعبان:ليه بقى الغلط..خلاص يا زمالكاوية بقيتوا تتكلموا
سعيد:ايوه لازم نتكلم..بص الواد شيكا بيعمل ايه..الواد دلوقتى بيبدع..لانه مابقاش عليه ضغط..مابيلعبش لنفسه ..وعارف ان عصر الشتيمة خلص..عرف انه حسام حيرد على المتخاذل فى حق نفسه انه مش حيلعب.. بص حسين ياسر تانى وتالت بيعمل ايه..بص علاء على تسلم رجله..دلوقتى خلاص..عندنا اللى يلعب اهلا وسهلا.. مابقاش عندنا الغالى غير اللى يدينا ويحبنا ويحب نادينا..غير كده بالسلامة..ومبروك عليكوا حمزة..اللى اديناله كل الفرص انه يبقى قائد..ومع ذلك مفيش.
شعبان:مش عارف اقولك ايه..بس الاهلى مشكلته ان البدرى عايز يثبت انه مش جوزيه وهو بتكشيرته ده محسسنى انه جوزيه..بس قريب حتلاقيه بيرمى جاكت الترنج عشان يقولك انا البدرى..من النهاردة مفيش جوزيه.. انا البدرى..انا البدرى.
ضحك الجميع فى دخلة الاستاذ مختار..قاطعهم..كام كام..فاقترب من الشاشة..0-0..كويس..عشان لما يدخل جول اتفرج عليه..ماتجبلنا ياد ياسيد دريم عشان التعليق يبقى ليه"شيكل" مع الكابتن بكر..فضحك الجميع
سعيد:ياه..بص حسين ياسر بيعمل ايه يا جدعان..والله الكبير كبير يابنى..ايه الحلاوة ده بجد.
نظر بخبث على شعبان..فوجده ياكل ضوافره..ونظر للواد سيد فوجده بيتفرج بيقول الواد ده نفسى اعرف مين سابه..فضحك واكمل المباراة واذا بمحمود فتح الله يحرز هدف الانقاذ..فانفجرت القهوة
سعيد:بجد اللى بيحصل ده اعجاز زى الكورتيزون..إى والله كورتيزون يا محمود بيه...الله يمسيك بالخير.
مختار:بجد احنا بقينا بعد ماكان الزمالك نكدنا..بقينا بنستناه تانى..بجد كده شيكل تانى بجد
شعبان:صراحة..انتوا اللى حيفوز فى ماتشينا وماتشكوا هو البطل الحقيقى..لاننا بمستوانا ده لو خدنا الدورى.. حيبقى بالعافية..ولو فزنا عليكوا يبقى احنا فزنا على فريق بجد قوى..بس الاسماعيلى تقيل برضوا.
فى هذه الاثناء..دخل الاستاذ محمد الزفتاوى..اعقلهم جميعا..فرحب الجميع به..نادى على سيد طالبا قهوة سادة.. وجلس يتابع المباراة حتى انتهائها..تجاذب اطراف الحديث..وخرج محللا الزمالك وماحدث
محمد:بصوا يا جماعة..الحكاية عمرها ماكانت مدرب بس..ولا لعيبة بس..انت يا زفت يا سيد..قلنا سادة مش سكر زيادة..غيرها لى..ثم أكمل..الموضوع منظومة..الزمالك حاول انه يبقى مجلس ادارة متألف..بس برضك بدأوا يتعاملوا بعشوائية بعد فترة..والدليل على كده رجوع هنرى ميشيل..الحكاية..ان تعيين حسام خلى للنادى فكر وتكتيك والتزام..سيبك من الروح والكلام ده..الموضوع ان اللعيبة ده عرفت ان اقرب حاجة للوصول للجماهير والفلوس والمنتخب هى انها تلعب كورة وتستمتع بيها..وكمان تمتع جماهيرها اللى كانت بتزهق مع اول خمس دقايق فى الشوط التانى.
الموضوع اكبر من اننا نحصر الموضوع فى حسام بس..حسام بيمثل 80% من اللى حصل..جماهير الزمالك بقت تحرك جبال مش صخور بمساندة غير طبيعية..الادارة بقت ساكتة لانها لازم تدعم مش تدرب وتتكتك وتضم لعيبة عالفاضى والمليان زى مواضيع متعب ومفاوضاته..دحنا بنتشل وهو بيلعب مع المنتخب..هو لاعب محلى من الطراز الرفيع انما لازم زى ما عمر جابر ده خد فرصته النهاردة..فيه ناشئين برضوا هدافين.
الحكاية باختصار..ان الاهلى قلتلكم قبل كده..فريق بيعرف يفوز..مش مهم يمتع اوى..فهو لما بدأت تعصلج معاه ..بانت حاجات كتير مستخبية اوى معاه زى ان فيه لعيبة ماتستحقش تلعب فيه..وناشئين فيهم ضعاف..ولاعبين اقوى من التغيير..ولعيبة لازم تلعب عشان اساميها..وده اللى كان فى الزمالك قبل حسام..عشان كده كان بيقع كل شوية..الزمالك دلوقتى خلى حتى هانى سعيد فاهم هو نازل يعمل ايه..مش يخبط فى فتح الله وتتلخبط وظايفهم..وبقى يقدم كورة هجومية حلوة.
سعيد:تفتكر طيب يا استاذ محمد حنفوز على الاسماعيلى
محمد:مش مهم نفوز..ومش مهم ناخد الدورى..المهم اننا عرفنا اننا زى التلميذ اللى ممكن بمذاكرة بسيطة.. ينجح بكل سهولة..بس لو شد حيله من الاول..يقدر يتميز..الحكاية اننا لازم بس نبقى اعقل فى تصريحاتنا وتفاؤلنا لان صعب اوى انك بعد ما كنت بتقول يارب نفوز..تقول يارب ما نخسرش ولا نقطة..فبلاش نتيجة تودينا وتجيبنا..الزمالك السنادى اثبت انه ممكن يرجع..وان جماهيره عمرها ما حتبطل ثقة فيه..الكبار يا جماعة لما بيقعوا يقدروا يقوموا ويقاوموا..الزمالك يمكن وقع..بس ماخسرش غير ان كان فيه حاجات كتير غلط.. الزمالك ساب فترة النقاهه..نقدر نقول الصبر على حسام اكتر..وحسام يبقى اهدى..والادارة تهدى..ونبدا فى ترتيب الاوراق الصح..ساعتها لا حنلوم فريقنا ساعة الهزيمة..ولا حنعمله مقصلة..ولا حنغلط تانى فى حق لعيبتنا.
سعيد:تسلم فمك يا استاذ محمد والله.
وللحديث كلام كثير حتى نهاية مايو..طالما الزمالك بهذا الشيكل..نراكم لاحقا فى قهوة اخرى!!
ملحوظة:الاستاذ سعيد دفع فى طلباته 5 جنيه وربع..و75 قرش بقشيش..اعتقد انه لازم يبقى فيه وقفه ضد الكافيهات النضيفة!!
[/size]

[/b]

مشكووووووووووووووووووووووور

» مائة عام من الانتماء ( كيف يحتفل الزمالك بالمئوية )؟؟
» هدف مباراه الزمالك × الجونه
» تابع لقاء الزمالك والاسماعيلي
» التشكيلة المتوقعة : الزمالك × انبي
» شاهد الزمالك وانبي مباشر